Дзырдтой нæ буц фыдæлтæ раджы,
Мæнг дуне, дам, уыди фынæй, æмыр æмæ саудалынг.
Стæй арвыл фæзынди мæйы зынг, стъалыты ‘рттывд,
æмæ кæрæй-кæронмæ нывæендгæ рацыд Æрфæныфæд.
Уыйфæстæ ссыгъди сæуæхсид,
æмæ цъæх арвыл фæзынди хуры цалх.
Стæй сæ рухсы ‘ндæрг фæрдыгау цæхæртæ ацагъдта
‘мæ арвæй фесхъиудта зынджыстъæлфæн.
Æмæ куы ‘рхаудта, уæд сау фæнык фестади зæххыл .
Хуыцау ысфæлдыста уыцы арвон арты сыгъдонæй Нарты.
Арвы цæссыгæй зæххыл сæвзæрди алцы ‘ппæт дæр:
хæхтæ ‘мæ дон, бæлас æмæ дыргъ, кæрдæг æмæ хор.
Фæзындысты сырдтæ.
Уалынджы хуры тæвдæй сулæфыд фурд,
æмæ фæзындысты Донбеттыртæ.
Æмæ cын радта Хуыцау адæмæн
зонд æмæ тых, амонд æмæ фыдбылыз.
Хъус-ма, ног фæлтæр, æз дын ракæнон
Сырдоны фæндырæй
нæ рагон фыдæлты æгъуыстаджы кадæг,
æз дын фæдзурон сæ таурæгътæ.